Rrjetet sociale sot, për shumë përdorues të tyre, janë kthyer në “dritare të hapura”, ku të tjerët mund të shikojnë më shumë sesa duhet nga jeta e tyre private, familjare dhe shoqërore.
Intimiteti familjar dhe shoqëror ka më pak rëndësi se sa përfitimi i disa lajkave dhe shikimeve më shumë. Një numër i madh i përdoruesve të rrjeteve sociale, pa i llogaritur mirë pasojat, postojnë dhe ndajnë me të tjerët detaje nga jeta e tyre private, duke postuar ushqimin e mëngjesit, pastaj të drekës e të darkës, ndejat dhe shëtitjet familjare, madje edhe punët dhe sexhdetë e bëra për hir të Zotit!
Shikuar nga prizmi dhe bontoni islam kjo çështje nuk duhet të merr përmasa të tilla, sa që edhe çështjet private të dalin nga “katër muret” e shtëpisë dhe ambientit familjar. Janë disa aspekte jetësore që duhet të mbeten në domenin privat, brenda intimitetit familjar e shoqëror dhe mos të publikohen pa nevojë në rrjetet sociale. Në lidhje me këtë, Muhammedi a.s. na mëson: “Publikimi i detajeve nga jeta private është e ndaluar (haram).” (Ahmedi, Bejhekiu).
Hfz. Mehas Alija
(Islampress.ch)
