Njerëzit të cilët i janë nënshtruar dhunës dhe padrejtësisë, më së shpeshti presin që dënimi i Allahut të arrijë shpejt te keqbërësi, menjëherë pas mizorisë dhe krimit të bërë.
Megjithatë, Kur’ani na mëson se jobesimtarët dhe keqbërësit kalojnë nëpër katër faza që duhen kuptuar në mënyrë që shpirti të cilit i është bërë padrejtësi të jetë i qetë dhe i sigurt se Allahu është Zoti i Plotfuqishëm dhe i drejtë dhe se dënimi i Tij i drejtë nuk do të anashkalojë. ndonjë keqbërës.
Faza e parë është t’i jepet kohë keqbërësit, siç thuhet në ajetin:
فَذَرْنِي وَمَنْ يُكَذِّبُ بِهَٰذَا الْحَدِيثِ ۖ سَنَسْتَدْرِجُهُمْ مِنْ حَيْثُ لَا يَعْلَمُونَ
وَأُمْلِي لَهُمْ ۚ إِنَّ كَيْدِي مَتِينٌ
Prandaj, më lër Mua me ata, që e mohojnë këtë Fjalë (Kuranin). Ne do t’i çojmë ata hap pas hapi drejt rrënimit të tyre, me mënyra që ata nuk i kuptojnë. Dhe do t’u japim atyre afat; vërtet që kurthi Im është i fortë! (Kalem, 44-45).
Në këtë ajet Allahu xh.sh., i jep kohë tiranit dhe zullumqarit në mos, vallë, do të pendohet për atë që ka bërë.
Faza e dytë është ajo që quhet “istidraxh”, shkatërrimi gradual. All-llahu xh.sh. thotë:
وَالَّذِينَ كَذَّبُوا بِآيَاتِنَا سَنَسْتَدْرِجُهُمْ مِنْ حَيْثُ لَا يَعْلَمُونَ
“Ndërsa ata që i mohojnë shpalljet Tona, dalëngadalë Ne do t’i shpiem drejt shkatërrimit, pa e kuptuar.” (El-A’raf, 182).
Kjo nuk do të thotë se dynjaja ka për ta ngushtuar jobesimtarin dhe zullumqarin dhe se atij do t’i mohohen të mirat dhe begatitë e saj, jo, por All-llahu xh.sh. ia hap dyert e dynjasë dhe të begative të saj, derisa ai të mendojë se nuk është duke u mashtruar dhe të besojë se është pronar i vërtetë i asaj që e posedon. All-llahu ia lehtëson rrugën drejt famës, pushtetit dhe pasurisë dhe rrethohet nga kënaqësitë dhe ëndrrat e realizuara, e pastaj befas e godet një dënim i merituar.
Faza e tretë është zbukurimi i veprimeve të shëmtuara. Domethënë, për jobesimtarët, tiranët dhe keqbërësit, shejtani ua zbukuron veprat e këqija dhe veprat e tyre të shëmtuara, siç thuhet në ajetin:
وَزَيَّنَ لَهُمُ الشَّيْطَانُ أَعْمَالَهُمْ فَصَدَّهُمْ عَنِ السَّبِيلِ فَهُمْ لَا يَهْتَدُونَ
“Djalli ua kishte hijeshuar atë veprim të tyre dhe i kishte shmangur prej rrugës së drejtë, andaj ata nuk gjejnë udhëzim.” (En-Neml, 24.)
Në këtë fazë, jobesimtari dhe keqbërësi i sheh veprat e tij të shëmtuara si të bukura, dhe tiparet e tij të neveritshme si virtyte. Krimet e tij kanë gjithmonë justifikime, madje ai beson se ka qenë detyra e tij të kryejë krime të tilla për hir të një qëllimi “më të lartë”.
Faza e katërt është dënimi i befasishëm i All-llahut, siç thuhet në ajetin:
فَلَمَّا نَسُوا مَا ذُكِّرُوا بِهِ فَتَحْنَا عَلَيْهِمْ أَبْوَابَ كُلِّ شَيْءٍ حَتَّىٰ إِذَا فَرِحُوا بِمَا أُوتُوا أَخَذْنَاهُمْ بَغْتَةً فَإِذَا هُمْ مُبْلِسُونَ
“Meqë lanë pas dore atë me çka u këshilluan (t’i drejtohen Zotit), Ne ua hapëm dyert e çdo gjëje (begatie) derisa kur u gëzuan për atë që ju kishte dhënë, i kapëm befas, e ata mbetën të zhgënjyer.” (El-En’am, 44.)
Zot i Madhërishëm, mbështetemi tek Ti nga të bërit padrejtësi dhe zullum dhe kërkojmë ndihmën Tënde në udhëzimin tonë të drejtë!
Përgatiti dhe përshtati:
Hfz. Mehas Alija
(Islampress.ch)
