Falënderimi i qoftë Allahut të Madhërishëm, kurse bekimi dhe paqja qoftë mbi Pejgamberin Muhamed (savs), mbi familjen e tij dhe mbi shokët e tij. Paqja dhe shpëtimi i Allahut qoftë edhe mbi shehidët, mbi të gjithë të vdekurit tonë dhe mbi njerëzit që kërkojnë rrugën e së mirës.
Të dashur vëllezër!
Hutbeja e sotme e mban titullin: “Nëse doni ta ndryshoni veten, ndryshojeni shoqërinë”
Shahisti hungarez Polgar besonte thellë në punën e palodhur. Ai hodhi poshtë idenë e talentit të lindur. Ai pohoi se me punën e menduar dhe me zhvillimin e shprehive të mira, fëmija mund të bëhet gjeni në çdo fushë të jetës. Thënia e tij ishte: “Gjeniu nuk lind, por ai bëhet duke mësuar dhe duke ushtruar e praktikuar.” Ai besonte në këtë ide aq shumë sa që vendosi ta provonte kur të kishte fëmijët e tij. Polgari vendosi që shahu mund të ishte i përshtatshëm për eksperimentin e tij dhe hartoi një plan përmes të cilit fëmijët e tij do t’i edukonte për t’u bërë mjeshtër shahu. Fillimisht, ai u martua me një grua që kishte mendime të ngjashme, kurse më pas e rregulloi shtëpinë në atë mënyrë, që kudo që të kthehej, gjithçka t’i ngjante shahut.
Pasi u martua, atij i lindën tri vajza. Fëmijët luanin shah kundër njëri-tjetrit dhe garonin nëpër turnire, kurse të gjitha ato i mbikëqyrnin me kujdes prindërit e tyre. Jeta e tyre plotësisht iu kushtua shahut.
Vajza e madhe filloi të luante shah në moshën katër vjeçe, kurse vetëm pas gjashtë muajsh ajo i mundte edhe të rriturit.
Vajza e mesme ishte edhe më e mirë. Në moshën katërmbëdhjetë vjeçe, ajo u bë kampione e botës në shah, kurse disa vjet më vonë, u bë edhe kryemjeshtër shahu.
Ndërkaq, vajza e vogël e arriti suksesin më të madh. Në moshën pesë vjeçare ajo po fitonte kundër babait të saj. Në moshën dymbëdhjetë vjeçe, ajo u bë lojtarja më e re që ishte në top listën e 100 shahistëve më të mirë në botë. Dhe kur ajo ishte 15 vjeç e 4 muajshe, ajo u bë kryemjeshtër më e re e shahut ndonjëherë. Për 27 vjet, ajo ishte numri një në botë në mesin e shahisteve femra.
Vëllezër të dashur!
Siç e shihni ne nuk i zgjedhim shprehitë tona, ne i imitojmë ato. Ne ndjekim ndonjë skenar që na është përcjellë nga miqtë dhe familja, nga shkolla jonë dhe nga komuniteti lokal. Me pak fjalë, ne i marrim shprehitë e njerëzve përreth nesh.
Allahu i Plotfuqishëm thotë:
„Besimtarët dhe besimtaret janë miq për njëri-tjetrin. Ata urdhërojnë që të bëhen vepra të mira dhe i ndalojnë të këqijat; falin namazin, japin zekatin dhe i binden Allahut dhe të Dërguarit të Tij. Këta janë ata që do t’i mëshirojë Allahu. Se, Allahu me të vërtetë, është i Plotfuqishëm dhe i Urtë.“ (et-Tevbe, 71)
Pejgamberi (a.s.) thotë:
“Njeriu është në fenë e mikut (shokut) të tij. Prandaj, secili prej jush le të ketë kujdes se kë e merr për mik (shok).”
Të dashur vëllezër!
Nëse duam ta ndryshojmë veten, le ta ndryshojmë shoqërinë, sepse është e pamundur që të gjithë rreth jush të jenë njerëz të këqij dhe të pandershëm, kurse vetëm ju të jeni të mirë. Proverbi ynë thotë: “Me kënd je, edhe ti je i tillë!”
Nëse duam t’i ndryshojmë fëmijët tanë, le ta ndryshojmë veten, sepse baballarët dhe nënat e kanë pothuajse të pamundur të shajnë, të luajnë bixhoz, të pinë alkool, të mos falen, të mos agjërojnë, të mos i respektojnë prindërit e tyre… e që fëmijët e tyre të jenë në rrugën e duhur, të jenë të stolisur me sjellje të bukura njerëzore dhe fetare.
Pejgamberi (a.s.) thotë: “Çdo fëmijë lind në natyrshmërinë e vet (në Islam), e prindërit e tij pastaj e bëjnë jehudi, të krishter ose zjarrputist.”
I lutemi Allahut të Plotfuqishëm, që neve, familjet tona dhe fëmijët tanë të na udhëzojë në rrugën e drejtë.
O Zoti ynë, me përulësi të lutemi t’i shpëtoshë vëllezërit dhe motrat tona në Palestinë.
O Zoti i mëshirshëm, bëj që të marrin fund vuajtjet e tyre, të cilat po zgjasin me dekada.
O Allah, bëj që fëmijët e Palestinës të jenë vetëm fëmijë dhe jo viktima të terrorit. Bëj që nënat t’i rrisin fëmijët e tyre të lumtur dhe jo t’i numërojnë plumbat në trupin e tyre.
O Allahu i Plotfuqishëm, bëj që hipokritët të cilët janë në gjendje të ndihmojnë, që më në fund t’i hapin sytë dhe ta bëjnë këtë.
O Sundimtar i drejtë, bëje Palestinën një oazë paqeje dhe xhenet në këtë botë. Amin!
Përshtati: Miftar Ajdini
(Islampress)
