Elvedin Hasanagić
Me emrin e Allahut dhe duke i dërguar selam Pejgamberit (savs), po e filloj këtë bisedë, sepse është rendi, që gjithmonë kështu të fillohet, veçanërisht të premten.
Në librin e shenjtë thuhet: “Allahu nuk e prish gjendjen e një populli për derisa ata ta ndryshojnë veten e tyre.” (err-Rra’d, 11)
Një natë po mendoja se sa shumë burra dhe gra ka, që gjithmonë ankohen, se nuk e kanë gjendjen mirë, asgjë nuk po ju shkon mirë, dhe gjithmonë thonë se duhet të bëhen ndryshime në shtet dhe në botë, por askush prej tyre nuk thotë se prej nesër unë do ta ndryshoj veten time, kështu që unë nuk do të jem më si deri tash, dhe Zoti e di, se sa mund të mbajmë në shpinë, sepse kurrë Ai nuk do të na ngarkojë përtej mundësive tona.
Përsëri, ju keni raste kur vëllai me vëllain nuk flasin për shkak të një copë tokë, edhe pse nuk e punon, e lënë djerrinë, vetëm ndonjëherë kur i kujtohet e kosit, që të mos mbushet me gjarpinj dhe t’i shkaktojnë telashe. E populli thotë: “Shejtani rri në megjë!” – por kot, përsëri secili i grah me të vetën.
Unë nuk jam shumë i ditur, por di diçka: Jepjani nëse nuk doni ose nuk keni kohë për arat dhe fushën, se do të fitoni sevape, të cilat do t’ju duhen shumë, do të keni nevojë..
Duhet të vrapojmë për sevape më shumë sesa për para, sepse paratë do të na çojnë në varr, kurse sevapet do të na presin atje. Le të shikojmë se kush ka nevojë për ndihmën tonë dhe mos të lavdërohemi me të, sepse ia zvogëlojmë vlerën, kurse Zoti e di se sa mundësi kemi, dhe Ai do të na shpërblejë dhjetëfish.
Ja pra, botë e dashur, kur flasim për ndryshimin, së pari duhet ta ndryshojmë veten. Ja, këto ishin disa këshilla, me pak fjalë. Ne të gjithë duhet të bëhemi njerëz më të mirë, të duhemi në mes veti, le të shikohemi në mes gishtave, të mos themi asgjë kur nuk kemi diçka të paramenduar në kokën tonë. Më mirë është që të heshtim.
Le të themi ‘Elhamdulil-lah’, kur gjithçka na shembet në qafë, le të shkojmë tutje, sepse Zoti i dashur thotë në Kuran: “Mbështetuni në Allahun! Allahu është Mbrojtësi i mjaftueshëm!”
Asgjë nuk duhet të zgjatet, sepse njerëzit mërziten, pastaj nuk ka dobi.
Për ta përmbledhur: “Sa herë të niseni për në qytet, le të marrim një euro ose dy, dhe kur ta takojmë dikë duke lypur, t’ia japim. Le të buzëqeshim, sepse edhe kjo është sadakë, dhe Zoti e di se si do të na shpërblejë.
Të gjithë duhet të shtrihemi në varr, andaj le t’i përgatisim valixhet tona ngadalë dhe t’i mbushim me sevape, sepse vetëm ato do t’i marrim me vete në botën tjetër. “Le t’i shmangemi grindjes me vëllain, fqinjin, mikun tonë, duhet pastaj ta marrim hallallin, sepse kurrë nuk i dihet se kush do të shkojë i pari, kështu që mund të shkojë ai, dhe nuk na ka bërë hallall. Le të heshtim, saherë që nuk jemi në humor të mirë. Le të themi ‘Elhamdulil–lah’, Zoti i dashur do ta bëjë më mirë, sepse Ai, gjithmonë pas shiut dhe reve e dërgon diellin.
E lusim Allahun e Plotfuqishëm, të na ndihmojë në ndryshimin dhe përmirësimin e gjendjes sonë, dhe të na e përmirësojë gjendjen tonë! – AMIN
Përkthim: Miftar Ajdini
(Islampress.ch)
