Vëllezër besimtarë!
Tema e hutbes së sotme është: ‘Takimi ynë është varri’
Vëllai im besimtar!
A i ke parë ndonjëherë varret?
A e ke parë ndonjëherë errësirën e tyre?
A e ke përjetuar ndonjëherë frikën e tij në një natë të errët?
A e ke parë trishtimin e tij?
A e ke parë ndëshkimin e tij?
A e ke parë thellësinë e tij?
A i ke parë parazitët dhe insektet e tij?
A nuk e di se ai është përgatitur edhe për ty, ashtu siç është përgatitur për të tjerët?
A nuk ndalesh pak e të mendosh se shokët, dashamirët e familjarët e tu janë transferuar prej pallateve në varre, nga djepat e ndriçuar në varreza të errëta, nga argëtimi familjar në vrazhdësinë e parazitëve dhe insekteve, nga kënaqësia me ushqime dhe pije të ndryshme në rrotullime nëpër dhe e baltë, nga përkëdheljet familjare në trishtim të vetmuar, nga një shtrat i butë në një vend të fortë?
Të gjithë i kaploi vdekja, befas, e tani banojnë në varre, pasi ishin duke jetuar në argëtime dhe lojra. U bënë të gjithë të njëjtë në ato gropa, iu nënshtuan vdekjes.
Lusim Allahun që t’i bëjë varret tona kopshte prej kopshteve të xhenetit!
Vëllezër të nderuar!
Hani Mevla (shërbëtori i Osmanit r.a.), ka thënë:
Osmani (r.a.), kur qëndronte pranë varrit qante, derisa iu lagte tërë mjekra. I është thënë: “Kur po e kujton xhenetin dhe xhehenemin nuk po qan, ndërsa po qan nga ky varr.” Osmani (r.a.), është përgjigjur: “Muhamedi (savs) ka thënë: ‘Varri është stacioni i parë i ahiretit, në qoftëse shpëton nga ai, të tjerët janë më të lehtë, e në qoftë se nuk shpëton nga ai, të tjerët pas tij janë më të vështirë.” Transmetuesi vazhdon të thotë se Muhamedi (savs) ka thënë: “Nuk kam parë asnjë pamje më të vështirë se sa varri.” (Ahmedi, Tirmidhiu dhe Albani)
Ndërsa në hadithin e Xhabir bin Abdullahut (r.a.), transmetohet se Muhamedi (savs), ka thënë: “Mos e dëshironi vdekjen, se parashikimi i saj është trishtues.” (…)
Ndërsa, Omer ibn Abdulazizi, duke iu folur një ditë shokëve të vetë tha:
“Kur të kaloni pranë varreve, thirrni ata, në qoftë se keni mundësi t’i thirrni. Kaloni pranë tendave të tyre e shikoni se sa afër janë pranë njëra-tjetrës, e tani pyetni të pasurit çka u ka mbetur nga pasuria e tyre, kurse të varfrit pyetni çka u ka mbetur nga varfëria? Pyetni për ato të cilat flisnin më parë me ta, e me sytë të cilët i shijonin gjërat me epshe, pyetni për lëkurat e buta e të holla, e për fytyrat e bukura, për trupat e ndritshëm. Çka u kanë bërë krimbat në qefinë (në varr)…?
Janë ngrënë gojët, janë prishur fytyrat, janë fshirë bukuritë, janë thyer eshtrat, janë coptuar gjymtyrët. Ku i kanë mbulojat dhe pallatet? Ku i kanë shërbëtorët, ku mbetën pasuritë e grumbulluara? A nuk janë në vendbanimet e tyre të vetmuar, a nuk është nata e dita për ta e njëjtë?
A nuk janë në një vend të errët, në mes tyre dhe veprave të tyre është bërë ndërprerje. Janë ndarë nga dashamirët, nga pasuria dhe nga familja.
O ti që nesër do të jesh banor i varrit! Çka të mashtroi në këtë botë? Ku e ke shtëpinë e gjërë, e lumin qarkullues? Ku janë pemët (frutet) e pjekura, ku i ke rrobat e holla, ku i ke parfumat, ku e ke mbulojën e verës e të dimrit?
O ti që ishe shpenzues i gjërave e tani u mbylle në varr!
Ah, sikur të dija se ç’do të më gjejë kur do të më takojë meleku i vdekjes, kur do të dal nga kjo botë… dhe çfarë mesazhi do të më sjellë nga Zoti im!
Tani u largua, Allahu e mëshiroftë!
E pas këtij momenti, Omer ibn Abdulazizi kishte jetuar vetëm edhe një javë.
I lutemi Allahut të Plotfuqishmin, që këshillat e sotme të jenë të dobishme për ne dhe të na ruajë nga zjarri i xhehenemit.
O Zoti ynë, na ndihmo në rrugë të mbarë. Largoje të keqen nga ne, dhe bëje që veprat tona më të mira, të jenë veprat e fundit në këtë botë!
O Zot, ndihmoju të rrezikuarve që t’i realizojnë të drejtat e tyre!
O Zot, çliroje umetin nga pandemia, nga okupatori dhe nga sundimtarët e dhunshëm!
O Zot, mos na sprovo neve me atë që nuk mund ta përballojmë!
O Zot, mos lejo asnjëherë që të na poshtërojnë apo mposhtin pabesimtarët.
O Zot, bëje që dita jonë më e lumtur të jetë dita e takimit me Ty! Dhe, me mëshirën Tënde na vendos në xhenetin e përjetshëm! Amin!
Përshtati: Miftar Ajdini
(Islampress)
