Abdullah ibn Mesudi radijallahu anhu thotë: “Sa herë që robi bën një mëkat, i shfaqet një pikë e zezë në zemrën e tij dhe kështu me radhë derisa e gjithë zemra i bëhet e zezë. Allahu i Lartësuar na ka njoftuar se mëkatet që kanë bërë janë shkaku i nxirjes së zemrave dhe se faji është i njeriut”.
– Muxhahidi ka thenë se ajo është gjynah pas mëkati derisa mëkatet e përfshijnë dhe mbulojnë gjithë zemrën dhe ajo vdes.
I Dërguari i Allahut, lavdia dhe paqja e Allahut qofshin mbi të, ka thënë: “…. dhe me të vërtetë kërkoj falje nga Allahu njëqind herë në ditë” d.m.th. për shkak të asaj që bën gabim ose e bën pa dashje sepse zemra e tij ka qenë gjithmonë e okupuar me Allahun e Madhëruar.
– Pejgamberi salAllahu alejhi ue selem ka thënë:
Në të vërtetë, kur një rob bën një mëkat, i shfaqet një pikë e zezë në zemër dhe nëse ai heq dorë nga ai mëkat dhe kërkon falje dhe pendohet, ajo pikë e zezë zhduket. E nëse vazhdon të bëjë mëkate, numri i pikave të zeza në zemër shtohet derisa ato pika të zeza të mbulojnë zemrën, që është mbulesa që Allahu i Madhëruar e përmend në Kuran: “Jo, nuk është ashtu! Ajo që ata bënë ua mbuloi zemrat e tyre. (Et-Tirmidhi, sahih)
– Ibnul Kajjim thotë se ky hixhab është një batanije e ngurtë dhe e pengon zemrën të shohë dhe të njohë të vërtetën dhe t’i bindet asaj.
– El-Hasan El-Basri thotë: “Në të vërtetë, ekziston një kufi i caktuar për mëkatet ndërmjet robit dhe Allahut azze ue xhel, kështu që kur robi arrin atë kufi, Ai i Lartësuar ia vulos zemrën dhe nuk do t’i japë kurrë sukses dhe hajër.”
– Abdullah ibn El-Mubarek ka thënë në vargje:
Unë shoh që mëkatet i vrasin zemrat…
ndërsa këmbëngulja ndaj tyre është poshtërim
Dhe braktisja e mëkatit është jeta e zemrës…
dhe është më mirë që njeriu të heqë dorë prej tyre.
Mënyra për ta braktisur mëkatin
Pastrimi i zemrës nga papastërtia e mëkatit dhe mbulesa që e pengon atë të shohë siç duhet, është një gjurmë besimi që e ruan vazhdimisht zemrën dhe kujdeset për shëndetin dhe dritën.
Imani forcon hajrin në zemër duke e pakësuar sherin dhe kështu forcon lidhjen e tij me Zotin. Duke bërë vepra të mira, mëkatet fshihen dhe kështu zemra ruan një derexhe të lartë – ajo e do imanin dhe e nënçmon kufrin, mëkatin dhe mosbindjen.
Një zemër e tillë nuk është e prirur për mëkat, mendime negative apo perceptime, kështu që nëse ndodh ndonjë nga këto – kur djalli përpiqet të fusë një vesves ose djajtë në formë njerëzore përpiqen ta bëjnë këtë – ajo mbrohet me sukses për shkak të gjendjes së shëndetshme, hajrit dhe nurit që janë në të.
Nga libri Derse edukimi nga hadithi i Pejgamberit
Autor: Halid el-Husejnan
Perktheu dhe pershtati: Sadri Iljazi
