Falënderimi dhe lavdërimi i takon Allahut të Plotfuqishëm për të gjitha begatitë që na ka dhënë. Falënderim të veçantë i shprehim për begatinë e Ramazanit.
I dërgojmë salavat dhe selam të Dërguarit të fundit dhe të dashurit të Allahut, Muhamedit (a.s.), familjes së tij, sahabëve të tij, dhe të gjithë robërve të mirë të Allahut.
Të nderuar vëllezër besimtarë;
Sot jemi në ditën më të mirë të javës, në ditën e xhuma, në muajin më të mirë të vitit, në muajin e bekuar të ramazanit, është xhumaja e fundit e muajit ramazan. E lus Allahun e Madhërishëm që bashkë me ju të na përfshijë në mëshirën e Tij. Begatitë dhe paqja e Allahut qofshin mbi ne, mbi familjet tona dhe mbi gjithë njerëzit që e duan begatinë dhe paqen e Allahut.
Sot po e përcjellim xhumanë e fundit muajit të bekuar ramazan. Në këtë ditë më të vlefshme të muajit më të vlefshëm duke ndjekur begatitë të cilat janë renditur, të marrim thelbin e tyre i cili do të jetë udhëzues deri në ramazanin e ardhshëm. Në këtë muaj të bekuar ne kemi mësuar se ramazani është i njëjtë për të gjithë, ju vjen të gjithë besimtarëve si mundësi. Ramazani është ‘mundësi’ e besimtarëve për të gjithë. Me solidaritet, me mirësi, me falje, me bujari … ne duhet të vazhdojmë të jetojmë edhe pas tij. Shprehia e ramazanit për unitet dhe barazi para Allahut, ndoshta është mësimi më i madh që duhet ta marrim me vete edhe pas bajramit. Allahu i Plotfuqishëm në Librin e tij të urtë thotë:
“Ndërsa ata që i janë frikësuar Zotit të tyre, do të çohen grupe-grupe në Xhenet. Kur t’i afrohen atij, dyert e tij do të hapen e rojtarët e tij do të thonë: “Shpëtimi qoftë mbi ju! Ju keni qenë njerëz të mirë, andaj hyni në të dhe qëndroni përgjithmonë.” (Ez-Zumer, 73)
Ne do të pyesim veten: “A do të jenë ato grupe të rreshtuara?” Në këtë botë ne jemi mësuar, që kur të hyjmë diku, të bëhemi rresht, njëri pas tjetrit. Ata që do të hyjnë në Xhenet, nuk do të hyjnë në rreshta, por me grupe, do të thotë, siç na konfirmon hadithi, në saffa.
Në një hadith autentik, të shënuar nga imam Taberani dhe Hakimi, Muhamedi (savs), ka thënë: “Banorët e xhenetit do të jenë 120 000, ju (Umeti i Muhamedit) do të jeni në 80 saffa.”
Të dashur vëllezër,
Në Xhenet do të hyhet në saffa, ashtu siç jemi renditur në namaz. Nëse në xhenet do të hyhet në saffa, a do të kemi arsye të shpresojmë se do të hyjmë në Xhenet, në qoftë se ne në këtë botë nuk kemi qenë në saffa?
Sikur që po angazhohemi për nafilet në ramazan, ne duhet të angazhohemi edhe për farzet jashtë tij. Shumë dijetarë muslimanë kanë paralajmëruar: “Gjëja më e çmendur është nëse ti pret që Allahu do t’i pranojë nafilet nëse nuk i ke kryer farzet.”
Pejgamberi ynë fisnik (savs), duke shkuar nga kjo botë na ka drejtuar këtë këshillë të fundit: “Namazin, namazin!” Na ka porositur të kujdesemi për namazin tonë, shtyllën e fesë sonë. Po këtë këshillë të fundit të Pejgamberit (savs), ta marrim si këshillë lamtumirëse me të cilën do të ndahemi nga miku ynë më i dashur që na e dërgoi Allahu i Madhërishëm, nga muaji ramazan. ‘Të kujdesemi për namazin tonë!’
Le ta shikojmë jetën tonë, nga fillimi deri në vdekje: Kur neve, si foshnje të porsalindur, na e vejnë emrin duke na e kënduar ezanin dhe ikametin, na kthejnë në drejtim të Kiblës; kur vdesim, anën e djathtë e trupit tonë të vdekur na e kthejnë kah Kibla; në varr na lëshojnë me anë të djathtë të kthyer kah Kibla. E gjithë kjo na tregon se si muslimanë, fati ynë është Kibla. Prandaj të vazhdojmë në të gjitha llojet e të mirave mbi të cilat na ka mësuar ramazani i bekuar. Ta arsyetojmë vazhdimësinë e qëndrimit tonë në safa, me dëshirën që në saffa të hyjmë në Xhenet.
Duke pasur parasysh se po i përcjellim ditët e fundit të muajit të agjërimit, mos të harrojmë se “Agjërimi ynë mbetët i vjerrur mes qiellit e Tokës, dhe se, nëse e pastrojmë me sadekatul-fitrin do të ndahet nga Toka dhe do të pranohet nga Allahu i Madhërishëm!”
Kryesia e BI të Kosovës edhe sivjet, mjetet nga sadekatul-fitri do t’i orientojë për mbajtjen e institucioneve arsimore; medresetë dhe FSI.
Prandaj, vëllezër të dashur! Le të mos bëhemi dembelë, por të përpiqemi të bëjmë ibadet sa më shumë në netët dhe ditët e mbetura të muajit të bekuar të Ramazanit.
O Allah, Ti je Mëshiruesi i Mëshiruesve.
O Allah, Ti je Krijuesi i të gjitha krijesave.
O Allah, Ti je që e sundon botën.
O Allah, Ti je të Cilit i takon çdo lavdërim dhe falënderim.
O Allah, na e prano neve agjërimin e Ramazanit.
O Allah, na e prano neve iftarin dhe syfyrin.
O Allah, na i prano namazet dhe lutjet në Ramazan.
O Allah, na i prano nafilet tona.
O Allah, bëje që puna jonë në Ramazan të llogaritet ibadet.
O Allah, bëje që gjumi ynë në Ramazan të llogaritet ibadet.
O Allah, na e prano sadakën tonë që e japim në Ramazan.
O Allah, bëje trupin tonë të pastër dhe të shëndetshëm.
O Allah, na i fal mëkatet që i kemi bërë gjatë Ramazanit.
O Allah, pranoje pendimin tonë të sinqertë.
O Allah, bëje që në çdo Ramazan të ardhshëm, ne të jemi më të mirë dhe më të përulur ndaj Teje se sa ai i mëparshmi.
Amin, Amin, ja Rabbel-alemin!
Përshtati: Miftar Ajdini
