Falënderimi dhe lavdërimi i takon Allahut të Plotfuqishëm për të gjitha begatitë që na ka dhënë. Falënderim të veçantë i shprehim për begatinë e Ramazanit.
I dërgojmë salavat dhe selam të Dërguarit të fundit dhe të dashurit të Allahut, Muhamedit (a.s.), familjes së tij, sahabëve të tij, dhe të gjithë robërve të mirë të Allahut.
Vëllezër besimtarë!
Tema e hutbes së sotme është: Le të përfitojmë nga Ramazani!
Tashmë jemi pothuajse në mes të Ramazanit, në të cilin kemi hyrë të stërmbushur me mëkate dhe të rënduar nga plagët e tyre, prandaj le t’i përtërijmë dhe pastrojmë zemrat tona nga plagët dhe gjurmët e mëkateve, dhe të trokasim me përulësi në derën e Zotit tonë të Mëshirshëm dhe të themi:
O Zot, unë robi yt mëkatar u ktheva kah Ti, sepse nuk mund ta durojë më shumë largësinë prej Teje.”
O Allah, ti ke shume robër të tjerë përveç meje, kurse unë nuk kam zot tjetër përveç Teje! Ti je Zoti im dhe strehimi im! Ti je kibla e shpirtit tim, andaj ma hap derën e mëshirës dhe faljes Tënde, më prano në mesin e të penduarve të sinqertë. Më regjistro në mesin e robërve Tu të përulur dhe më ringjall me agjëruesit.
Të dashur vëllezër, le të përfitojmë nga Ramazani!
Ky është muaji në të cilin e kemi fytin të tharë dhe të etur, por zemrën të ujitur, në të cilin stomakun e kemi të zbrazur por shpirtin të plotë, në të cilin trupi na dobësohet, por besimi na forcohet.
Prandaj, le ta rinovojmë besimin, sepse Allahu nuk ka nevojë për urinë dhe etjen tonë, por Ai na e dërgon Ramazanin e bekuar, që të na pastrojë plotësisht nga mëkatet, në mënyrë që të jemi të denjë për mëshirën, kënaqësinë dhe afërsinë e Tij.
Le të përfitojmë nga Ramazani!
Nëse uria dhe etja na lodhin, atëherë le të marrim forcë dhe frymëzim nga besimtarët e gjeneratave të para, të cilët e mposhtën urinë dhe etjen, dhe luftuan në rrugë të Allahut, duke sakrifikuar jetën e tyre në emër të Allahut, që neve të na mbetet Ramazani.
Ramazani është beteja në Bedër, kur Islami për herë të parë e nxori shpatën në mbrojtje të Kuranit, në mbrojtje të së Vërtetës dhe drejtësisë, në mbrojtje të njeriut dhe lirisë së tij të vërtetë.
Ramazani është çlirimi i Mekës, qytetit që më në fund e rifitoi identitetin e tij duke u bërë kryeqyteti i monoteizmit (tevhidit). Ky ishte momenti kur i Dërguari i Allahut (savs), mekasve të mbledhur dhe të mposhtur, të cilët i kishin bërë shumë të këqija, u tha: “Shkoni, ju jeni të lirë!” dhe kur Bilali, robi i deridjeshëm nga çatia e Qabes me krenari shpalli: “Allahu ekber! – Allahu është më i madhi!”
Ramazani është beteja e Kadisijes, kur pas fitores së lavdishme në betejë, Omer bin Hattabi e pyeti Sa’d ibn Ebi Vakkasin dhe Ebu Mihxhenin: “Sa zgjati beteja?” Ata i thanë: “Nga sabahu deri në ikindi!”
Atëherë ai u tha: “Subhanallah, e pavërteta nuk mund të qëndrojë kaq shumë para së Vërtetës. Ndoshta kjo është për shkak të mëkateve të juaja dhe të mia.”
Ramazani është Poatje (ose Pallati i Shehidëve) në Francë dhe Abdurrahman el-Gafiki, i cili, duke ardhur me ushtrinë muslimane 70 kilometra afër Parisit, thirri: “O Allah, merr nga gjaku im dhe nga jeta ime, derisa të jesh i kënaqur me mua!”
Vëllezër! Ramazani është edhe shumë beteja dhe ngjarje të muslimanëve gjatë historisë së tyre të lavdishme, të cilat ju japin forcë e moral gjenetaratave të sotme – pra edhe neve që ta mposhtim urinë dhe etjen, dhe të kontribuojmë sa më shumë dhe të përfitojmë nga Ramazani.
Të dashur vëllezër!
Ramazani më së miri i pastron zemrat, andaj, le t’i pastrojmë zemrat tona dhe të kemi kujdes që të mos dalim nga Ramazani me të njëjtën zemër siç kemi hyrë në të!
******
O Allah, Ti je Mëshiruesi i Mëshiruesve.
O Allah, Ti je Krijuesi i të gjitha krijesave.
O Allah, Ti je që e sundon botën.
O Allah, Ti je të Cilit i takon çdo lavdërim dhe falënderim.
O Allah, na e prano neve agjërimin e Ramazanit.
O Allah, na e prano neve iftarin dhe syfyrin.
O Allah, na i prano namazet dhe lutjet në Ramazan.
O Allah, na i prano nafilet tona.
O Allah, bëje që puna jonë në Ramazan të llogaritet ibadet.
O Allah, bëje që gjumi ynë në Ramazan të llogaritet ibadet.
O Allah, na e prano sadakën tonë që e japim në Ramazan.
O Allah, bëje trupin tonë të pastër dhe të shëndetshëm.
O Allah, na i fal mëkatet që i kemi bërë gjatë Ramazanit.
O Allah, pranoje pendimin tonë të sinqertë.
O Allah, bëje që në çdo Ramazan të ardhshëm, ne të jemi më të mirë dhe më të përulur ndaj Teje se sa ai i mëparshmi.
Amin, Amin, ja Rabbel-alemin!
Përshtati: Miftar Ajdini
