Transmeton Buhariu dhe Muslimi nga Ebu Hurejre Allahu qoftë i kënaqur me të, se i dërguari i Allahut s.a.v.s. ka thënë: “ Kur vjen ramazani, hapen dyert e xhenetit, mbyllen dyert e xhehenemit dhe lidhen shejtanët “.
Në një transmetim tjetër nga Muslimi: “ … dhe prangosen shejtanët “.
Allahu i lartëmadhëruar, në univers ka krijuar tri krijesa që i ka ngarkuar me përgjegjësi.
- Engjujt, të krijuar nga drita, e të cilët janë krijesa të urta. Nuk i refuzojnë Allahut atë që i urdhëron, dhe bëjnë gjithë atë që urdhërohen.
2. Exhinët (shejtanët), të krijuar nga zjarri, e që janë krijesa ekstreme me fuqi të jashtëzakonshme.
3. Njeriu, i krijuar nga dheu, krijesë mesatare mes engjujve dhe exhinëve.
Pasi që Allahu e krijoi njeriun, i urdhëroi engjujt të bien në sexhde për krijimin e Ademit a.s.
Të gjithë iu përgjigjën Zotit përveç Iblisi ( i pari i shejtanëve), i cili refuzoi urdhërin e Zotit.
Pas kësaj Allahu e përjashtoi nga mëshira e Tij dhe nga të gjitha përgjegjësitë që kishte.
Shejtani kërkoi nga Allahu që t’ia shtyen dënimin ndaj tij deri në ditën e kijametit, dhe Allahu ia shtyu dënimin deri në kijamet.
Shejtani nga mllefi që njeriu u bë sebep që ai të përjashtohet nga mëshira e Zotit dhe të dënohet përgjithmonë në xhehenem,, e kërcënoi njeriun se do ta sulmojë gjithmonë me të gjitha mundësitë dhe mënyrat deri sa t’ia shkatërrojë jetën dhe ta devijojë nga rruga e drejtë e besimit në Zotin.
Ai, nga ai moment dhe përgjithmonë e ndjek njeriun në çdo moment dhe çdo kohë.
Mundësia që ka shejtani për ta dëmtuar njeriun është vetëm sugestioni dhe ndikimi në mendje që njeriu të mendojë gabimisht, futja e dyshimeve në adhurime, dyshime ndaj të tjerëve, të jetë i ashpër me veten e tij, humbja e besimit në vetveten, futja e frikës etj.
Pra, shejtani nuk ka asnjë mundësi që njeriun ta dëmtojë fizikisht.
Kërkimi i mbrojtjes te Zoti nga shejtani me mënyrat që na ka mësuar feja si: Përmendja e Zotit, lutjet e ndryshme, leximi i kuranit, namazi etj. është nevojë e përhershme. Andaj mos të thotë askush se tash jam në ramazan dhe nuk ka nevojë për kërkim të mbrojtjes nga ndikimi i tij.
Në muajin e ramazanit hadithi i mësipërm tregon se shejtanët janë të paaftë për të ndikuar te agjëruesit, sepse ata prangohen, apo lidhen, apo paaftësohen, apo pengohen për të ndikuar.
Dijetarët për këtë hadith dhe kuptimet që dalin nga ai, kanë dhënë mendime të shumta dhe të ndryshme.
KUSH ËSHTË I MBROJTUR NGA SHEJTANËT NË RAMAZAN ?
Këtu janë të mendimit se të mbrojtur janë, jo të gjithë muslimanët, por vetëm agjëruesit dhe ata që janë në dispozitë të agjëruesit si: të sëmuarit, të shtyerit në moshë, udhëtarët etj., duke përjashtuar mëkatarët, qofshin edhe agjërues.
Pastaj kan dhënë mendime se, prangosja e shejtanëve a është në kuptimin e vërtetë real apo kuptimorë alegorik.
Këtu janë ndarë në tre grupe:
- Prangosja mund të jetë edhe reale edhe alegorike së bashku. Që nënkupton se, shejtanët paaftësohen në ndikimin e tyre, dhe bëhen sikur të prangosur, dhe kështu besimtarët janë të mbrojtur nga dëmtimet e tyre.
2. Prangosja është realitet. Ata prangosen dhe ndalohen për ti dëmtuar besimtarët, dhe për të ndikuar te ta. I këtij mendimi është Kurtubiu, Ibnul Mundhir etj.
3. Prangosja është vetëm alegori dhe jo realitet.
Sepse është Allahu Ai që i mbron muslimanët në ramazan, ose shumicën e tyre.
Dhe kështu shejtani nuk mundet në ramazan të ndikojë te muslimanët, sikur që ka ndikur te ta gjatë gjithë vitit.
I këtij mendimi është: Ibnu Abdul berr etj.
Duke qëndruar në këtë grup, Ibnu Haxheri ka thënë: Prangosja e shejtanëve nënkupton paaftësinë e tyre në vesvese dhe në zbukurimin e epsheve.
Edhe ata që thonë se prangosja është realitet, e kan ndërlidhur me ndikimin e tyre te njeriu vetëm në veprat e tij, dhe kjo nënkupton pengimin, prangosjen dhe lidhjen.
Dijetari i fikhut hanefi Eturbeshti thotë: Prangosja apo lidhja e shejtanëve nënkupton: Zbritja e mëshirës së Zotit dhe largimi i pengesës në ngritjen e punëve te Zoti.
KUR BËHET PRNGOSJA ? NË NETËT APO DITËT E RAMAZANIT, DHE A VEÇOHET ME NDONJË KOHË TË VEÇANTË ?
Ka thënë Kadi Elhalimi: Mendohet se prangosja e shejtanëve në ramazan është vetëm ditëve të ramazanit. Dhe ai këtë e ka aluduar në shejtanët Elmeredeh, të cilët vjedhin informacionet nga qielli, sepse në një prej haditheve përmenden ata shejtan.
Kurse Essujuti thotë: Kuptimi i hadithit është i përgjithshëm ( pra në të gjitha ditët dhe netët ), sepse hadithi nuk veçon kohën vetëm me ramazanin.
CILËT SHEJTAN PRANGOSEN, TË GJITHË APO VETËM DISA PREJ TYRE ?
Në këtë pikë ka shumë mendime, më kryesoret janë:
1. Të gjithë shejtanët.
2. Vetëm disa prej tyre, psh. Shejtanët Elmeredeh, ata që vjedhin informacionet nga qielli.
3. Kryesori i shejtanëve, Iblisi.
NËSE NË RAMAZAN PRANGOSEN APO LIDHEN SHEJTANËT, PSE SHOHIM TË KËQIJA DHE MËKATE QË NDODHIN NË RAMAZAN ?
Kurtubiu thotë: Mëkatet dhe të këqijat në ramazan pakësohen te agjëruesit, të cilët janë të kujdesshëm në kushtet dhe rregullat e agjërimit, por jo edhe te ata agjërues të cilët nuk i përmbahen këtyre kushteve dhe rregullave.
Edhe nëse e pranojmë se shejtanët janë të prangosur nga secili agjërues, kjo nuk nënkupton që të mos ketë të këqija dhe mëkate në ramazan, sepse të këqijat dhe mëkatet nuk vijnë vetëm nga ndikimi i shejtanëve por edhe nga shkaqe të tjera të shumta.
Prej tyre:
1. Njeriu shpirtlig. Që kënaqet me të këqijat që i bën ai ose edhe nga të tjerët.
2. Traditat e këqija në shoqëri. Që janë adaptuar me to.
3. Shejtanët nga njerëzit. Dhe këta janë më të rrezikshëm se shejtanët nga exhinët, sepse shejtanët nga exhinët ndikojnë vetëm në mendjen e njeriut dhe jo në fizikun e tij. Pastaj nga këta mbrohesh shumë lehtë, psh. vetëm me një përmendje të Zotit, lexim Kurani, namaz etj.
Kurse shejtanët e njerëzve ndikojnë edhe në mendjen e njeriut edhe në fizikun e tij, dhe nga këta është më vështirë të mbrohesh.
4. Mëkate të veçanta me të cilat njeriu është adaptuar gjatë jetës me to dhe nuk arrin që të lirohet prej tyre psh: Nervoza, sharjet dhe ofendimet, përgojimet, shikimi në haram, lënia e namazit etj etj.
5. Efektet nga ndikimet e shjetanëve më herët, që janë rrënjosur në shpirtërat e mëkatarëve, ku këta nuk mund të lirohen prej tyre.
6. Dr. Ali Xhumuah thotë: Ndikimet e shejtanëve nga larg përmes teknologjive bashkohore që mund ti përdorin edhe ata, në pika të dobëta te agjëruesi, kur e gjejnë agjëruesin në gjendje të pavëmendshme duke ia kujtuar agjëruesit atë mëkat.
SI MUND TA DALLOJMË SE MËKATI ËSHTË NGA SHEJTANI APO NGA VETË NJERIU ?
Imam Sha’ravi thotë: Nëse e ndjen të shtyer veten se don të bësh ndonjë mëkat të veçantë, atëherë kjo është nge vetja jote. (dmth. pikë e dobët që njeriu jeton me të).
E nëse je i shtyer për çfarëdo mëkati, atëherë është nga shejtani, sepse qëllimi i shejtanit është që të të shtyej të bësh mëkat pavarësisht çfarë është ai.
Mr. RAGMI DESTANI
Literatura:
Fet’h elbari – Ibnu haxher el askalani
Umdetul Karië – sherh Sahih elbuhari
El insan veshejtan – Imam Esha’ravi
Literaturë nga Interneti
