Ndërgjegjja e pastër është më e rëndësishme sesa mendimi dhe pikëpamja jonë për botën
Ata e pyetën: “Cila është arsyeja për jetëgjatësinë tënde?” Çfarë ushqimi han?”
Ai u përgjigj: “Nuk marr pjesë në diskutime dhe konteste të pafrytshme.”
Ata i thanë, “Kjo është e pamundur.”
Ai u përgjigj: “Keni të drejtë.”
Një mik më tha se – ndryshe nga praktika e tij e zakonshme – ai nuk merr pjesë më në diskutime kontroverse. E luta që të ma shpjegojë se çka ka ndryshuar në jetën e tij, kurse ai tha:
“E kam kuptuar se ndërgjegjja e pastër është më e rëndësishme sesa pikëpamja ime.”
Parimi kuranor: “Dhe kij durim ndaj asaj që të thonë dhe largohu nga ata në mënyrë të bukur.” (el-Muzzemmil, 10), na mëson se zhurmës mos t’i përgjigjemi me zhurmë, as në fyerje dhe mallkim mos të përgjigjemi me fyerje dhe mallkim, por të kënaqemi me bukurinë e jetës larg nga kjo kategori e njerëzve.
Marrëdhëniet tona të mira me njerëzit mbahen dhe zgjasin me lehtësim dhe falje, kurse harmonia në marrëdhëniet ndërnjerëzore rriten me kënaqësi reciproke.
Marrëdhëniet ndërnjerëzore sëmuren me cikërrima, kurse vdesin dhe zhduken përmes shqyrtimit dhe hulumtimit të detajeve më të vogla.
I është thënë një të devotshmi: “Si ke arritur që të tërhiqesh nga kjo botë dhe sfidat e saj?”
Është përgjigjur: “Unë jam bindur se do të largohem nga kjo botë, desha apo nuk desha, kështu që e zgjodha që të shkoj nga kjo botë si rob i përulur i Allahut.”
Një nga shenjat më të mëdha të udhëzimit dhe vetëdijes se Allahu na sheh dhe na dëgjon, është ruajtja e gjuhës dhe shikimit, sepse këto janë organet që më shpejtë dhe më lehtë dalin jashtë kontrollit, që më shumë gabojnë dhe në të cilat duhet pasur kujdes në kohën e fitnes (ngatërresave).
Hatim el-Esami ka thënë: “Kam menduar rreth ajetit: “Na, furnizimin e kësaj jete e kemi ndarë…” (ez-Zuhruf, 32), dhe e kuptova se Allahu i Plotfuqishëm, ua ka ndarë njerëzve nafakën, andaj askujt nuk ia kam zili për begatitë që posedon.”
Përkthim: Miftar Ajdini
