Falënderimi qoftë për Allahun e Madhërishëm, prej të cilit kërkojmë ndihmë, falje dhe udhëzim. Ndërsa bekimet e Allahut qofshin për Muhamedin a.s. për familjen e tij, për shokët e tij dhe për të gjithë ata që e ndjekin rrugën dhe mësimet e tij deri në amshim.
Vëllezër besimtarë!
Hutbeja e sotme titullohet: Njerëzit janë dy grupe, vallë, cilit grup i takojmë ne?!
Me një rast, një grup i njerëzve shkojnë te plaku i urtë për ta pyetur për këshilla.
Ti, o plak i urtë, vazhdimisht po na flet që të mendojmë pozitivisht. Do të dëshironim që të na këshillosh se si të përballemi me problemet e paraqitjes së të metave të tjerëve. Në fakt, te ne shpesh vijnë njerëz dhe ankohen për të tjerët, sesi ata i përgojojnë, i tallin dhe ju gjejnë gabime. Si të sillemi me njerëzit e tillë të cilët i akuzojnë të tjerët?
Plaku i urtë u përgjigj: Unë e di nga përvoja se njerëzit pothuajse ndahen në dy grupe, i treti nuk ekziston. Njerëzit ose i përkasin njërit grup ose tjetrit.
– Grupi i parë i përngjajnë mizës! Tipari kryesor i mizave është se ato i tërheq papastërtia. Kur p. sh. miza gjendet në një kopsht plot me lule, me aroma të bukura, ajo fare nuk i vëren ato, por shkon dhe ndalet në ndonjë ndyrësirë që e gjen në tokë. Pastaj fillon t’i sillet përreth dhe ndihet mjaft qetë në erë të keqe. Sikur të kishte mundësi të fliste miza, dhe sikur nga ajo të kërkojmë të na e tregojë një trëndafil në kopsht, ajo do të na përgjigjej: Unë fare nuk e di se si duket trëndafili, unë di të gjej vetëm plehra, mbeturina, tualete, myk dhe zhul.
Ekzistojnë njerëz të cilët ju përngjajnë mizave. Njerëzit që i përkasin këtij grupi janë mësuar që të mendojnë negativisht, neveritshëm, pakontrollueshëm në jetë dhe gjithmonë i kërkojnë anët e këqija, duke e nënçmuar dhe refuzuar praninë e çdo të mire.
– Grupi i dytë janë ata të cilët i përngjajnë bletës. Tipari kryesor i bletëve është se ato gjithmonë kërkojnë diçka të ëmbël, të bukur dhe të këndshme për të fluturuar mbi të. Sikur të gjendej bleta në një dhomë plot me papastërti me një copë të sheqerit në qoshe, ajo do t’i injoroi të gjitha papastërtitë dhe do të fluturojë mbi sheqer. Sikur nga bleta të kërkonim të na tregonte plehun dhe papastërtinë, ajo do të na përgjigjet: Nuk di, unë vetëm mund të ju tregojë ku mund të gjeni lule, mjaltë dhe sheqer! Ajo di vetëm për gjëra të mira në jetë, ndërsa të këqijat për të janë të panjohura..
Ky është grupi i dytë i njerëzve të cilët kanë mendime pozitive dhe e shohin vetëm anën e mirë të gjërave. Ata gjithmonë përpiqen ta fshehin të keqen, gabimet, për t’i mbrojtur të afërmit. Ndërsa njerëzit e grupit të parë përpiqen që t’i gjejnë të këqijat dhe gabimet dhe t’i nxjerrin në sipërfaqe.
Prandaj, kur dikush të vjen tek ne dhe të fillojë t’i akuzojë dhe përgojojë të tjerët, duke ju gjetur gabime, na vë në situatë të vështirë dhe ne gjithmonë duhet t’ua tregojmë këtë shembull. Të ju themi le të vendosin se cilit grup ata duan t’i takojnë!
Të dashur vëllezër,
Është për të ardhur keq, që ka njerëz mes nesh të cilët i japin vetes të drejtë, që të kujdesen për njerëzit e tjerë dhe për veprimet e tyre, më shumë se sa për vetveten dhe për familjen e vet. Është për keqardhje, që në mesin tonë ka njerëz të cilët në çdo punë të kryer vetëm zbulojnë gabime dhe të meta, e kurrsesi atë që është e bukur dhe e mirë. Është për keqardhje gjithashtu, që në mesin tonë ka njerëz të cilët në oborrin e huaj e shohin gjembin, kurse në oborrin e tyre nuk e shohin trungun. Këta, padyshim, e kanë harruar ajetin kuranor ku Allahu i Plotfuqishëm thotë: “… Kushdo që bën diçka, punon për vete dhe askush nuk ngarkohet me barrën e tjetrit. Pastaj të gjithë do të ktheheni te Zoti juaj dhe Ai do t’ju tregojë për kundërshtitë që kishit mes jush.” (el-En’am, 164)
Vëllezër të dashur,
Islami na mëson që të kemi mendim të mirë për vëllezërit muslimanë. Islami na mëson që tek vëllezërit tonë të shikojmë vetëm atë që është e mirë, kurse atë që është e keqe ta fshehim.
Pejgamberi savs ka thënë: “Mos i shqetësoni robërit e Allahut. Mos i shani dhe mos i përqeshni. Mos ua hulumtoni të metat dhe turpet. Kush ia zbulon një turp të vëllait muslimanë, edhe Allahu do t’ia zbuloj të metat e tij, dhe atij që ia zbulon Allahu të metat, do ta turpërojë në shtëpinë e tij.”
Malik bin Dinari ka treguar: Isai a.s. një herë kaloi me ndihmësit e tij pranë trupit të pajetë të një qeni, e ata kur e vunë re thanë: Sa shumë kundërmon ky qen i ngordhur! Kurse Isai a.s. me atë rast tha: Sa dhëmbët e bardhë që i ka!
Pra, Isai a.s. nuk ka dashur të thotë asgjë të keqe as për një qen të ngordhur, por është përpjekur të gjejë diçka të mirë në kufomë dhe atë ta përmend. Atëherë me sa shumë vëmendje dhe kujdes ne duhet t’i kërkojmë cilësitë e bukura apo virtytet e ndonjë njeriu, kur Isai a.s. këtë e ka bërë në rastin e një qeni?!
Hasan Basriu ka thënë: “O njeri! Nuk ke iman të vërtetë, derisa të tjerëve ua gjen të metat, ndërsa as vet nuk je pa to. Prandaj, së pari evitoji të metat tua, dhe lëri të tjerët dhe të metat e tyre. Por, dije, se kurrë nuk do të mundesh t’i eliminosh të gjitha të metat tua, andaj është më urgjente që të merresh me to. Dhe nëse don të jesh i drejtë, mos i hulumto të metat e njerëzve të tjerë, atëherë edhe tek Allahu i Plotfuqishëm do të jesh i dashur. O njeri! Sa i dobët dhe i pakujdesshëm që je! Të tjerëve po u gjen mëkate, ndërsa mëkatet tua po i neglizhon dhe harron. Në syrin e vëllait tënd po e sheh një grimcë, kurse në syrin tënd nuk po e sheh traun. Sa e vogël është drejtësia jote, e sa e madhe është padrejtësia jote!”
Vëllezër të respektuar,
Të bëhemi si bleta, e cila zbret në atë që është e këndshme, kurse e tejkalon atë që është pakëndshme. E mos të bëhemi si miza, e cila e kërkon vetëm atë që është e keqe dhe e pakëndshme.
O Zoti ynë, na i fshih turpet tona! Na e prano pendimin tonë! Na i fal mëkatet dhe lëshimet tona!
O Zoti ynë, mos na merr shpirtin duke mos qenë Ti i kënaqur me ne.
Përshtati: Miftar Ajdini
