Falënderimi qoftë për Allahun e Madhërishëm, prej të Cilit kërkojmë ndihmë, falje dhe udhëzim. Salavatet, selami dhe bekimet e Allahut qofshin për Muhamedin (a.s.), për familjen e tij, për shokët e tij dhe të gjithë ata që e ndjekin rrugën dhe mësimet e tij deri në Ditën e Gjykimit.
Vëllezër të dashur!
Tema e hutbes së sotme është: ‘“Njeriu është në fenë e mikut të tij…”
Allahu i Plotfuqishëm, thotë në Kuran: “O besimtarë! Mos i merrni jobesimtarët për miq në vend të besimtarëve! A mos vallë doni t’i sillni Allahut dëshmi konkrete, kundër jush?” (en-Nisa 144)
Një njeri e gjeti një vezë të shqiponjës dhe e futi nën një klloçkë në fermën e tij në fshat.
Së bashku me zogjtë e pulës, çeli edhe shqiponja e vogël dhe u rrit me ta. Gjatë gjithë jetës së saj, shqiponja bënte të njëjtën gjë sikurse edhe pulat, duke menduar se edhe ajo është një prej tyre. Ajo çukiste nëpër tokë duke kërkuar krimba dhe insekte. Ajo bënte kllok-kllok dhe kikiriku, i tundte nganjëherë krahët duke fluturuar disa metra në ajër.
Vitet kaluan dhe shqiponja u plak. Një ditë pa mbi vete, në qiellin e pastër, një zog të mrekullueshëm. Zogu me një dinjitet të këndshëm, fluturonte nëpër rrymat e forta të ajrit dhe mezi tundte krahët e tij të artë. Shqiponja e shikoi qiellin me habi dhe pyeti: “Kush është ky zog?”
Pula, e cila po qëndronte pranë saj, i tha: “Kjo është shqiponja, mbreti i zogjve. Ajo i përket parajsës, kurse ne i përkasim tokës – ne jemi pula”.
Dhe kështu shqiponja jetoi dhe vdiq si pulë, sepse ajo mendoi se edhe ajo vetë është pulë.
Vëllezër të dashur!
Çka do të jemi ne, shqiponja apo pula? Zgjedhja varet nga ne, sepse Pejgamberi (savs), thotë: “Njeriu është në fenë e mikut të tij, andaj secili nga ju, le ta shikojë se me kënd po qëndron!” Kurse thënia popullore thotë: “Me kënd shkon, edhe ti je i tillë.”
Allahu i Plotfuqishëm dhe Pejgamberi (savs), përmes Kuranit dhe sunetit, na këshillojnë se kush nuk duhet të jetë miku ynë i ngushtë. Me fjalën ‘mik i ngushtë’, nuk nënkuptojmë se ne me të nuk guxojmë të dalim ndonjëherë me të për kafe, të kemi raport të ndershëm dhe të drejtë, ta vizitojmë kur është i pikëlluar ose i gëzuar… por këtu mendojmë për atë, me të cilin do ta ndajmë të mirën dhe të keqën, me të cilin do të këshillohemi, me të cilin do t’i ndajmë sekretet tona më të fshehta, me të cilin do ta kalojmë pjesën më të madhe të kohës.
• Miku ynë i ngushtë, nuk duhet të jetë ai, i cili do të na largojë nga dispozitat e Allahut të Plotfuqishëm, të shpallura përmes Kuranit, përkatësisht, nga urdhëresat ose ndalesat, sepse Allahu i Plotfuqishëm thotë: “Dhe, atë Ditë zullumqari do t’i hajë gishtat e duarve të veta, e thotë: “Ah! Ta kisha marrë rrugën (e drejtë) me Pejgamberin! – Ah! Sikur të mos e kisha bërë atë apo këtë mik! – Ai, më ka zmbrapsur nga Kurani që më ka ardhur mua!” – e djalli (po ashtu edhe njeriu i keq), e lë gjithmonë njeriun në poshtërim.” (el-Furkan, 27–29)
• Miku ynë i ngushtë, nuk duhet të jetë ai që i ndjek epshet e tij, sepse Allahu i Plotfuqishëm thotë: “Mos dëgjo atë – zemrën e të cilit ia kemi lënë të zbrazët nga të përmendurit Neve dhe që i ndjek qejfet (epshet) e veta, dhe punët e të cilit janë të shfrenuara.” (el-Kehf, 28)
• Miku ynë i ngushtë, nuk duhet të jetë ai që lufton kundër Allahut dhe të Dërguarit të Tij, sepse Allahu i Plotfuqishëm thotë: “Nuk gjen njerëz që besojnë në Allahun dhe në Ditën e Kiametit, e të ushqejnë dashuri ndaj atyre të cilët kundërshtojnë Allahun dhe Pejgamberin e Tij, madje qofshin ata edhe etërit e tyre, ose bijtë e tyre, ose vëllezërit e tyre, ose farefisi i tyre.” (el-Muxhadele, 22)
• Miku ynë i ngushtë, nuk duhet të jetë ai që është mëkatar i madh ose jobesimtar, përkatësisht, ai që nuk ka frikë nga Allahu i Plotfuqishëm, sepse Pejgamberi (savs), ka thënë: “Me të vërtetë shembull i shokut të mirë dhe të keq, është si shembulli i shitësit të aromave dhe farkëtarit që përhap shakull farkëtari. Shitësi i aromave ose ju dhuron aromë, ose ju shet aromë, ose ju prej tij do të nuhasni aromë të këndshme e të bukur, kurse ai që përhap shakull farkëtari, ose do t’ju përshkojë rrobat tuaja, ose nga ai do ta nuhasni aromën e pakëndshme.”
Ndërsa Omeri (r.a.), thoshte: “Lëre armikun, ruaju nga miku, përveç atij që te populli i tij është i besueshëm, dhe i besueshëm është vetëm ai që ka frikë nga Allahu. Mos u shoqëro me mëkatarin, sepse do të marrësh nga e keqja e tij, as mos ia beso sekretin, dhe kur dëshiron të këshillohesh, pyeti ata që kanë frikë nga Allahu.”
• Miku ynë i ngushtë, nuk duhet të jetë ai që tallet me fenë tonë, sepse Allahu i Plotfuqishëm thotë: “Miku juaj është vetëm Allahu, Pejgamberi i Tij dhe besimtarët, të cilët falin namazin, japin zekatin, që janë modest e të përvuajtur ndaj Allahut. – Me të vërtetë, ata që marrin për mik Allahun, Pejgamberin e Tij dhe ata që besojnë, (ata janë në anën e Allahut); dhe ana e Allahut do të jetë fitues. – O besimtarë! Mos i merrni për miq ata, të cilët, fenë tuaj e marrin për tallje dhe lojë, qofshin ata, të cilëve ju është dhënë Libri para jush, apo qofshin mohuesit, – dhe kini frikë Allahun, nëse jeni besimtarë!” (el-Maide, 55-57)
Sesa janë të sakta këto fjalë të Allahut të Plotfuqishëm, muslimanët tanë janë bindur edhe në luftën e fundit, sepse shumë krime mbi popullin tonë, pikërisht i kanë kryer ata, me të cilët më parë kishim jetuar bashkë, ishim shoqëruar dhe ata i dinin fshehtësitë tona!
Allahu na ruajtë nga miqtë e tillë dhe na dhashtë miq, të cilët do të jenë të dobishëm për ne si në këtë botë, ashtu edhe në botën e ardhshme.
O Zot, na forco neve në rrugën e Islamit! Ndihmoju vëllezërve tanë muslimanë, në çdo vend ku janë të kërcënuara të drejtat e muslimanëve dhe jepu atyre fitore të shpejtë!
Na bëj neve udhëheqës të umetit në devotshmëri, në bujari, në guxim, në modesti e përulësi!
Udhëzoji fëmijët tanë dhe pasardhësit dhe bëri ata gëzimi i syve dhe zemrave tona!
Na mëshiro në Ditën e Gjykimit dhe na ndero me xhenet në shoqëri me pejgamberët, me të sinqertët, me dëshmorët dhe me njerëzit e mirë! Amin !!!
Përshtatje: Miftar Ajdini
