Falja e namazit të teravive kryhet në shtëpi në Maqedoninë e Veriut, në të cilën zbatohet ndalesa e daljes në rrugë për shkak të koronavirusit të ri (COVID-19) i cili ka prekur mbarë botën, raporton Anadolu Agency (AA).
Me ardhjen e muajit të Ramazanit në xhamitë e vendit është e pamundur falja e namazeve të teravive, pasi prej disa javësh në kuadër të masave kundër pandemisë në vend është ndaluar falja në mënyrë kolektive e namazeve nëpër xhami si dhe nuk mund të falen as namazet e xhumasë.
Familjet muslimane në kryeqytetin e vendit, Shkup, namazin e teravive e falin në shtëpi për shkak të ndalesës së daljes në rrugë që zbatohet në vend pas orës 19:00 sipas kohës lokale.
Gjatë faljes në përgjithësi imam bëhet anëtari më i moshuar i familjes ndërsa pjesëtarët e tjerë, përfshirë gratë dhe fëmijët formojnë radhët pas imamit.
– “Jemi privuar nga xhamitë për shkak të pandemisë”
Edhe hafizi Abdülbaki Baki, imam i xhamisë Arasta në Shkup i fal namazet e teravive në shtëpi bashkë me familjen e tij. Në namaz Baki bëhet imam ndërsa anëtarët e tjerë pas tij rreshtohen në saf.
Imami 74-vjeçar Baki në një deklaratë për AA tha se që në fëmijërinë e tij ka qenë i angazhuar me nxënës për mësimin e Kur’anit dhe në xhami të ndryshme ka kryer detyrat si muezin, orator dhe imam.
Baki tha se “Muajt e Ramazanit i kemi kaluar në mënyrë entuziaste me namazet e teravive dhe me këndimin e Kur’anit në mënyrën ‘mukabele‘. Ndërsa këtë vit për shkak të pandemisë për herë të parë jemi të privuar nga xhamitë dhe besimtarët e saj. Kjo na bën shumë të trishtuar. Ashtu sikurse edhe namazet e tjera gjatë ditës, sikurse të gjithë edhe ne namazin e teravive e falim familjarisht në shtëpi”.
“Urojmë që kjo fatkeqësi të eliminohet sa më parë”, tha Baki i cili shtoi se “Shpresojmë që të bashkohemi sërish me xhamitë dhe besimtarët tanë. I uroj muajin e bekuar të Ramazanit të gjithë botës islame”.
