(Tregim për një ngjarje të vërtetë)
Në kohën e indiferencës dhe ftohjes njerëzore, shembulli i djaloshit të papunë Fahd b. Halef er-Rubved esh-Shemri (28 vjeç) nga Arabia Saudite na tregon guximin e madh, përkushtimin dhe fisnikërinë e madhe, si dhe thënien se e mira kthehet me të mirë.
Fahdi ia dhuroi veshkën e tij Muhamed b. Tari esh-Shemriut (14 vjeç), një djali pa baba.
Ky tregim ka filluar rreth 9 muaj më parë, kur ai duke udhëtuar për në qytetin e tij të lindjes Hā’il, në veriperëndim të Arabisë Saudite, nga automobili i tij e pa një grua plakë duke ecur rrugës nëpër diell të fortë dhe nxehtësi të madhe, e cila po përpiqej ta ndalte një taksi. Plaka qante dhe ai u ndal duke pyetur se a mund ta ndihmonte. Ajo e luti që ta dërgonte deri në spital.
Gjatë rrugës, plaka vazhdoi të qante, dhe ai e pyeti për arsyen e vajit të saj. Ajo i tha se djali i saj i vetëm ishte në spital në dializë dhe ishte në gjendje shumë kritike. Atë ditë ajo frikësohej se djali i saj nuk do të mund të shkonte në dializë, sepse ajo nuk do të mund të arrijë me kohë të paguajë. Ajo gjithashtu, i tha atij se familja e saj nuk po mund të siguronte donator dhe nuk kishin para të mjaftueshme për të kryer transplantim diku jashtë vendit. Djali me vite kishte vuajtur nga dështimi i veshkave dhe gjendja e tij ishte shumë kritike.
I riu e pyeti plakën për babanë e djalit, por ajo u shkreh në vajë, i tha se babai i tij kishte vdekur dhe se fëmija ishte jetim.
I riu tha: “Unë i thashë asaj: ‘Mos u shqetëso, unë jam djali i yt i dytë dhe ne do të gjejmë një zgjidhje për problemin tuaj.” Kur shkuam në spital, shkova në ordinancë dhe pyeta për gjendjen e të riut. Më thanë se ishte në një situatë shumë të vështirë dhe kishte nevojë për transplantim sa më të shpejtë. Thashë: “Unë do t’ia dhuroj veshkën këtij të riu, do t’ua lehtësoj gjendjen dhe do tu ndihmoj.”
Ky veprim imi e habiti plakën, e cila qante dhe i lutej Allahut për mua.”
Pas ekzaminimeve dhe analizave mjekësore u krye transplantimi i veshkës, i cili shkoi me sukses.
Pasi lajmi i këtij gjesti të mrekullueshëm u përhap nëpër mediat saudite, një anëtar i familjes mbretërore e shpërbleu Fahdin me punësim në Gardën Kombëtare, njoftuan mediat saudite.
Njeriu i parë i Gardës Kombëtare Saudite, princi Mutab bin Abdullah bin Abdulaziz, e ftoi Fahdin në spital në Riad, për t’i dëshiruar shëndet të mirë dhe e falënderoi atë për këtë akt fisnik”, ka transmetuar gazeta saudite Sabk.
Princi urdhëroi që Fahdi menjëherë të emërohej në Gardën Kombëtare.
”Jam shumë i lumtur për thirrjen e princit dhe vendimin e tij për emërimin tim në Gardën Kombëtare… ajo që bëra ishte një pikë kthese në jetën time… Unë jam shumë i kënaqur që kam gjetur një punë pas përpjekjeve të kota në dy vitet e fundit”, ka thënë Fahdi.
Ndihma e Allahut, fitorja dhe suksesi mund të vijnë prej nga nuk mund të imagjinoni kurrë.
Në të vërtetë, Allahu i Plotfuqishëm, u ndihmon atyre që i ndihmojnë të tjerët. Herën tjetër, kur ta shihni dikë që ka nevojë për ndihmë, të madhe apo të vogël, mos hezitoni, rrëmbeni shansin dhe bëjeni atë në emër të Allahut.
Shpërblimi i Tij është i paimagjinueshëm. “Allahu e ndihmon robin e Tij, përderisa ai e ndihmon vëllanë e tij të besimit.” (Muslimi)
Përkthim: Miftar Ajdini
