Thuhet se një fermer kishte një fermë në afërsi të bregut të detit dhe shpesh shprehte nevojën e tij për punëtorë, por shumica e njerëzve nuk donin ta pranonin punën në bregdet, sepse kishin frikë nga stuhia, e cila shpesh shpërthente dhe i shkatërronte ndërtesat dhe të mbjellat. Për këtë arsye, pronari i fermës, sa herë që bisedonte me punëtorët potencialë, në fund përballej me refuzimin e tyre.
Në një rast iu afrua një njeriu me moshë mesatare, të dobët dhe e pyeti: “A ke përvojë në punët bujqësore, dhe a kishe punuar në fermën time?”
Njeriu u përgjigj: “Unë i di mirë punët bujqësore dhe ato rreth bagëtive, por duhet të dish se unë fle gjatë kohës së stuhisë!”
Edhe pse pronari i fermës ishte i hutuar nga kjo përgjigje, u detyrua ta pranonte atë si punëtor, pasiqë të gjithë të tjerët e refuzuan ofertën. Megjithëse fizikisht i dobët dhe i thatë, njeriu punonte me përkushtim në fermë nga agimi deri në perëndim të diellit dhe pronari ishte plotësisht i kënaqur me punën e tij.
Një natë, fryri erë e fortë në breg të detit dhe sinjalizoi një stuhi. Pronari i fermës kërceu nga shtrati, mori baterinë dhe vrapoi në dhomën ku flinte punëtori i tij. E trazoi, duke i bërtitur: “Zgjohu, po vjen stuhia, duhet t’i mbyllësh të gjitha dhe ta përgatitësh fermën për stuhinë!”
Njeriu u kthye kah ai dhe i tha me vendosmëri: “Jo, zotëri, unë ju kam thënë juve se unë fle gjatë kohës së stuhisë!”
Pronari i fermës u zemërua shumë nga reagimi njeriut dhe pothuajse nuk plasi nga inati, por në vend se të humbas kohë, ai me shpejtësi doli nga shtëpia në mënyrë që të përgatitej për stuhinë.
Mirëpo, për habinë e tij të madhe, ai zbuloi se të gjitha stallat ishin të mbuluara me një mbulesë të veçantë, në dyer ishin vendosur kunjat e hekurt, dhe të gjitha dritaret ishin të mbyllura dhe të mbrojtura. Atëherë pronari i fermës e kuptoi se çka do të thotë të ketë punëtor të mirë dhe të besueshëm në fermë. Më pas edhe ai, gjithashtu, u kthye në shtratin e tij për të vazhduar gjumin derisa frynë era. Pra, punëtori në fermë ka mundur të flejë pa gajle, pasiqë e kishte siguruar mirë fermën.
Kështu, edhe ne mund të sigurohemi nga stuhitë e jetës, duke e lidhur jetën dhe zemrën tonë me fuqinë e fjalës së Allahut dhe udhëzimin e Tij. Nëse përgatitemi mirë, atëherë nuk kemi pse të frikësohemi. Prandaj, le ta pyesim veten, a mund të flemë të qetë, derisa erërat e stuhisë së jetës na fryjnë rreth nesh?
Përkthim: Miftar Ajdini
